NBC Bank Azərbaycan Kubokunun ¼ final “Neftçi” – “Xəzər Lənkaran” oyunu ikincilərin möhtəşəm qələbəsi ilə tarixin yaddaşına köçdü.İnsafən demək lazımdır ki,bu qarşılaşma xarici çempionat oyunlarından heç nə ilə fərqlənmirdi.Oyunboyu Uinston Parks və Juliay Vobayın sürətli keçidləri, başgicəlləndirici texnikası stadiona gələn və televiziya ekranı qarşısında matçı izləyən azarkeşlərə zövq verirdi.Lakin belə gözəl qarşılaşmaya oyunun baş hakimi öz ədalətsiz qərarları ilə dmğasını vurdu.Hər şey “Xəzər Lənkaran” komandasının vurduğu birinci qoldan sonra başladı.Bu qoldan sonra Anar Salmanov ssenarinin pozulduğunu anlayıb özünü itirdi.Amma onun köməyinə Flavinyo gəldi.O, ”Xəzər Lənkaran” komandasının cərimə meydançasında özünü yerə atır və Anar Salmanov cənubluların qapısına haqsız olaraq 11 metrəlik cərimə zərbəsi təyin edir.Amma Anar sən saydığını say gör “Xəzər Lənkaran” nə sayır.Fasiləyə qədər “Neftçi”ni iki dəfə mərkəzə dəvət edən “Xəzər Lənkaran” birinci hissəni iki top fərqlə üstün durumda bitirir.
    İkinci hissə başlayır və Anar şou davam edir.Hissə ərzində əksər ikili mübarizələrdən sonra “Neftçi” komandasının xeyirinə cərimə zərbəsi təyin edən baş hakim “Xəzər Lənkaran” komandasının əks hücumlarının qarşısını lazımsız yerə fit verməklə alırdı.Bundan əlavə heç nəyə görə Mirça Redniki texniki zonadan uzaqlaşdıran baş hakim Elnur Abdullayevə qarşı edilən kobudluğu,Flavinyonun dirsəklə Kamran Ağayevə vurduğu zərbəni və digər qayda pozuntularını görmədi və yaxud görmək istəmədi.
    Oyundan sonra Kamran Ağayevin əsəbləşdiyini görən “Neftçi” komandasının vitse prezidenti Tahir Suleymanov “Onlar nə istəyir? Qələbə qazanıblar da”! deməklə təəccübünü gizlətmədi.Çox hörmətli Tahir müəllim məgər siz bilmirsiniz Kamran nə istəyir?Kamran tapdalanmış haqqını,haqsız təyin olunmuş 11 metrlik cərimə zərbəsinin hesabını və düzgün hakimlik istəyir.Amma sizdən bir xahişim var,sabah komandanızın mirzəbaşı olan Elnur Əşrəfoğlu ilə birgə car çəkməyin ki,hakimlərin “Neftçi”yə kömək etməsi cəfəngiyyatdır.Əgər hakimlər “Neftçi” komandasına kömək etsəydilər komandamız qələbə qazanardı.Bu ifadaləri azarkeşlər eşidib.Yeni bir şey fikirləşin ki,azarkeşlərə də maraqlı olsun. 
    Adım kimi əminəm ki,Anar Salmanov tək bu şounu göstərməkdə cürət etməzdi.Onun rəisi və bütün hakimlərin vəkili olan Xəqani Məmmədov bu şounun pərdəarxası iştrakçısı idi.Buradan üzümü PFL və Hakimlər Komitəsinə tutub demək istəyirəm ki,ayıbınız olsun (türklər demişkən yazıqlar sizə),azarkeşlərə hakimlərin ifasında klounluq lazım deyil.Azarkeşlərin əsəbləri ilə oynamayın,komandaların haqqını yeməyin.Kiminsə qabağında əyilmək istəyirsinizsə əyilin,özünüz bilərsiz.Amma elə edin ki,əyiləndə zərbə sizə dəysin klublara yox.